Хаҗга юллама откан Данил Хәйриев намазга 14 яшендә баскан

Чаллыда Татарстан Республикасы мөселманнары Диния нәзарәте кубогына татарча көрәш һәм кул көрәше буенча XI Бөтенроссия берләштерелгән турниры төгәлләнде.
Ярышларның гомуми нәтиҗәләре буенча командалар арасында төп җиңүче һәм Диния нәзарәте кубогы иясе булып Яр Чаллы командасы танылды. Икенче урында - Әлмәт районы. Өченче урынны исә Оренбург өлкәсе һәм Татарстанның Саба районы командалары үзара бүлеште.
Җирәбә нәтиҗәләре буенча турнирның төп бүләге - хаҗга юлламаны 18 яшьлек Чаллы егете Данил Хәйриев отты. Ул милли көрәш буенча 80 кг үлчәү категориясендә I урынны яулады. Төп бүләкне аңа Татарстанда хаҗны оештыру буенча рәсми оператор “ДУМ РТ Хаҗ” вәкиле Илдус Сабитов тапшырды.
Бүгенге көндә Данил Хәйриев - Яр Чаллы политехник көллиятенең чыгарылыш курс студенты. Милли көрәш белән дүртенче ел шөгыльләнә. Намазга 14 яшендә баскан. "Мин, һичшиксез, бик шат. Һаман да төп бүләкне отуыма күңел ышанмый", - дип, кичерешләре белән уртаклашты булачак хаҗи.
Искәртеп узыйк: хаҗга юллама һәр спорт төре буенча үз авырлык категорияләрендә җиңүче дип табылган спортчылар арасында җирәбә уздыру нәтиҗәсендә уйнатылды.
Ярышларда Татарстан шәһәрләреннән һәм районнарыннан, шулай ук Башкортстан, Удмуртия республикаларыннан, Оренбург һәм Самара өлкәләреннән барлыгы 68 көрәшче һәм 38 армрестлер көч сынашты. Турнирга кадәр аларның һәммәсе намаз уку тәртибен белү буенча тест узды, дип хәбәр итә dumrt.ru