Хыяллар чынга ашканда
Рәхмәт, Димаш! Казах җырчысы кемнең хыялын тормышка ашырды
– Хыялларыңның чынга ашуы – бик күп шатлыклы мизгелләр алып килә һәм син яшәүнең ни дәрәҗәдә бәһасез икәнлеген аңлыйсың. Шуңа күрә киләчәктә дә хыялланырга, башкаларга да хыялланырга ярдәм итәргә кирәк, – дип уйлый хыяллары чынга аша торган Ләйсән Сәетназарова.
Ләйсән тумышы белән Чаллыдан. 7 яшендә аның баш миендә яман шеш табалар. Шул вакыттан башлап кыз берничә операция һәм химиотерапия курсын үтә, ләкин авыруны җиңеп булмый. Хәзер аңа 21 яшь, сул колагы бөтенләй ишетми, уң колагы 30%ка гына ишетә. Күзләре начарлана, хәтере югалып ала, ләкин терелергә дигән өмете сүрелми.
Ләйсән һәм аның әнисе Әлфия бу соңгы ярты елда Анжела Вавилова исемендәге балалар хосписында яши. Монда килгәч, битараф булмаган кешеләр тырышлыгы белән, кызның хыяллары бер‑бер артлы чынга аша башлаган.
ЮЛБАРЫС БАЛАСЫН СЫЙПАРГА
– Май аенда хосписка Андрей Малаховның тапшыру төшерү төркеме килде. Малаховның ярдәмчесе – журналист Александр Козявин, безнең белән шактый вакыт бергә булды, Ләйсән аңа үз хыяллары турында сөйләде, – ди Ләйсәннең әнисе Әлфия Сәетназарова.
Бер айдан соң палатада могҗиза була. Хосписка яңадан репортерлар килә, ләкин бу юлы алар үзләре генә түгел: юлбарыс баласы белән! Дрессировщик Михаил Зарецкий Ләйсәннең палатасына, сыйпап карасын, дип, Лилу исемле юлбарысны алып керә.
– Юлбарыс баласы белән очрашу мизгелен мин беркайчан да онытмам. Бу минем өчен көтелмәгән могҗиза булды, бөтенләй дә мөмкин эш дип уйламаган идем. Лилуны палатага алып кергәч, барлык хисләрем бергә кушылды: шаккату, сөенеч, бәхет тә, – дип сөйли җанланып киткән Ләйсән. – Юлбарысның балалары да шундый зур икән. Ай ярым гына булса да, ул шактый гәүдәле иде. Лилу минем белән уйнады, иркәләнде, мин үземне бик бәхетле итеп тойдым!
Миша абый (юлбарыс баласының хуҗасына Ләйсән шулай дип эндәшә хәзер. – Ред.), кызның чын дустына әйләнә. Алар телефоннарын алыша, дрессировщик хәзер Ләйсәнгә көн саен Лилуның фото һәм видеоларын җибәреп тора. Юлбарыс баласы ай үсәсен көн үсә! Ә кыз яңа дустына үзенең хәлләре турында сөйли.
ДИМАШ БЕЛӘН ОЧРАШУ
– Бу җәйдә бер генә түгел, берничә хыялым чынга ашты. Башта мин искиткеч кешеләр, юлбарыс баласы белән таныштым, ә аннары кумирым – Димаш белән очрашу насыйп булды.
Танылган казах җырчысы Димаш Кудайбергенов Ләйсән турында Малаховның «Күз яшьләре белән хыяллар» дигән тапшыруын төшергәндә белеп ала. Шулвакыт ул кыз өчен видеосәламләү яздыра, аны Ләйсән үзенә бүләк ителгән телефон аша карый. Ә бераз соңрак, WordSkills Kazan 2019 чемпионаты ярдәмендә, башкаручының тыгыз графигында Татарстан башкаласы барлыкка килә.
– Ул хосписка ябылу тантанасы башланырга сәгать ярым вакыт калганда килеп керде. Кунак турында мин алдагы көнне белдем, кызыма әйтмәдем, сюрприз ясыйсым килде, – дип сөйли Ләйсәннең әнисе.
Кыз да сүзгә кушыла:
– Ниндидер гадәти булмаган вакыйга булыр, дип сизенгән идем. Очрашу көненә каршы төндә төшемә Димаш керде, ул минем өчен иртәнге сәгать 4кә кадәр җырлады. Шуңа күрә йокым да туймады, ләкин ниндидер могҗиза көтү халәтендә идем. Әнинең дә палатаны башка төрле итеп җыештыруына, бизәнүенә игътибар иттем... Мин аннан сорадым да әле: «Әни, син бүген нишләп шундый матур соң?», – дип. Әни: «Кәефем яхшы, шуңа гына», – диде, һәм башыма Димашның фанатлар төркеме бүләк иткән казах яулыгын бәйләргә кушты.
Очрашу вакытында кыз да, җырчы да югалып кала. Ләкин беренче дулкынлану хисләре тынгач, алар ихлас күңелдән утырып сөйләшәләр.
– Ул килеп кергәч, югалып калдым, җанымны кая куярга белмәдем. Үземә-үзем: «Ләйсән, тынычлан, барысы да яхшы, кычкырма, тирән сула», – дип пышылдадым. Минем аңа бармак очлары белән генә кагылып карап: «Ул тере, ул монда!» – диясем килде. Сәер булып күренмәс өчен, үземне тыйдым инде, – дип көлә Ләйсән. Мин аннан ничек шундый гаҗәеп башкару осталыгына ирешүе турында сорадым. Ул миңа 5 яшьтән җырлый башлавы, ата-анасының һәм дусларының иҗади кешеләр булулары һәм һәрвакыт аңа ярдәм итүләре турында сөйләде.
Кызның караваты янында хәзер автографлы Димаш портреты эленеп тора. Казах теленнән тәрҗемәсе дә эчкерсез гади: «Ләйсәнгә, сеңлемә, хөрмәт белән Димаштан».
– Аның тавышын мин беренче тапкыр 2017 елда ишеттем, Кытайда чыгыш ясавы иде. Бу тавыш һәм башкару рәвеше мине таң калдырды, ләкин мин аның исемен истә калдырмадым һәм аннары таба да алмадым. Ә быел мин аны тагын күрдем һәм тыңлый башладым. Аның җырлавы, хисләрен белдерү үзенчәлеге, тавышының мөмкинлекләре – барысы да минем күңелемә тынычлык бирә.
СӘЛАМӘТЛӘНЕРГӘ!
– Ләйсән икенче класста укыганда чирли башлады, шуннан соң без вакытыбызның күп өлешен хастаханәләрдә үткәрәбез, – дип сөйли Әлфия. – Безнең өчен кызыбызның исән булуы һәм тормыш өчен көрәшүе – үзе зур бүләк һәм уртак хыялыбызның чынга ашуы.
– Иң зур хыялым – терелү, бу катлаулы һәм озын юл, – ди хыяллары чынга аша башлаган кыз. – Ләкин мин сәламәтләнүемә ышанам. Хыял чынга ашканда, үзеңне бәхет канатларында очкан кебек хис итәсең. Хәзерге вакытта минем кебек үк хыялланучыларга теләгем шул: хыялланыгыз, бөтенләй чынга ашарлык булмаса да, хыялга омтылыгыз, башкаларга да үз теләкләрегез турында сөйләгез, чөнки ярдәм итә алырлык кешеләр гел очрап тора.
ҮЗ ФАНАТЛАРЫНЫҢ ФАНАТЫ
Димаш белән элемтәгә керергә аның Самарадагы фанатлары ярдәм итте. Алар кумирларының чыгышын карарга дип, WorldSkills Kazan 2019 чемпионатының ябылу тантанасына башкалабызга килгәннәр иде. Чыгышы алдыннан Димашның Казан хосписына барып, анда яткан Ләйсән исемле кызның күптәнге хыялын тормышка ашырачагын да алар беренчеләрдән булып белделәр. Һәм аны борчымаска тырыштылар. Шуңа күрә «Татарстан»ның сорауларын үзләренең «ВКонтакте»дагы төркемнәре аша юлладылар. Җавапларны концерт тәмамлануга ук алдылар. Димаш – үз фанатларының фанаты – озак көттермәде.
– Димаш, сез ни өчен Казан хосписындагы кыз янына барырга булдыгыз?
– Мин башкача булдыра алмыйм. Минем иҗатымны үз иткәннәргә бик зур хөрмәт белән карыйм. Мин бит үз фанатларымның фанаты.
– Үзеңне кемнеңдер тормышка ашырылган хыялы итеп сизү ничегрәк?
– Үземне кемнеңдер тормышка ашырылган хыялы яисә йолдыз итеп сизмим. Йолдызлар – күктә, ә мин – гади кеше, тик бераз җырлый белүче. Без барыбыз да бу дөньяга, иң беренче чиратта, кеше булыр өчен, зур хәрефтән язылырлык Кеше булыр өчен килгәнбез, бары тик аннан соң гына җырчы, укытучы, табиб һәм башкалар булабыз.
Югарыда аталганнарга өстәп, фанатлары үзләренең кумирын бик тыйнак егет диләр, беркайчан да үзе эшләгән игелекле эшләр турында сөйләмәс. Ул уңайсызланып җилкәләрен генә җыерачак. Ә күркәм эшләрне ул күп эшли. Үз туган көнендә, тамагы авырткан килеш, шау-шуларсыз гына картлар йортына барып, өлкәннәр каршында акапелла җырлаган җырчыларны күп беләсезме?
Ләйсән тумышы белән Чаллыдан. 7 яшендә аның баш миендә яман шеш табалар. Шул вакыттан башлап кыз берничә операция һәм химиотерапия курсын үтә, ләкин авыруны җиңеп булмый. Хәзер аңа 21 яшь, сул колагы бөтенләй ишетми, уң колагы 30%ка гына ишетә. Күзләре начарлана, хәтере югалып ала, ләкин терелергә дигән өмете сүрелми.
Ләйсән һәм аның әнисе Әлфия бу соңгы ярты елда Анжела Вавилова исемендәге балалар хосписында яши. Монда килгәч, битараф булмаган кешеләр тырышлыгы белән, кызның хыяллары бер‑бер артлы чынга аша башлаган.
ЮЛБАРЫС БАЛАСЫН СЫЙПАРГА
– Май аенда хосписка Андрей Малаховның тапшыру төшерү төркеме килде. Малаховның ярдәмчесе – журналист Александр Козявин, безнең белән шактый вакыт бергә булды, Ләйсән аңа үз хыяллары турында сөйләде, – ди Ләйсәннең әнисе Әлфия Сәетназарова.
Бер айдан соң палатада могҗиза була. Хосписка яңадан репортерлар килә, ләкин бу юлы алар үзләре генә түгел: юлбарыс баласы белән! Дрессировщик Михаил Зарецкий Ләйсәннең палатасына, сыйпап карасын, дип, Лилу исемле юлбарысны алып керә.
– Юлбарыс баласы белән очрашу мизгелен мин беркайчан да онытмам. Бу минем өчен көтелмәгән могҗиза булды, бөтенләй дә мөмкин эш дип уйламаган идем. Лилуны палатага алып кергәч, барлык хисләрем бергә кушылды: шаккату, сөенеч, бәхет тә, – дип сөйли җанланып киткән Ләйсән. – Юлбарысның балалары да шундый зур икән. Ай ярым гына булса да, ул шактый гәүдәле иде. Лилу минем белән уйнады, иркәләнде, мин үземне бик бәхетле итеп тойдым!
Миша абый (юлбарыс баласының хуҗасына Ләйсән шулай дип эндәшә хәзер. – Ред.), кызның чын дустына әйләнә. Алар телефоннарын алыша, дрессировщик хәзер Ләйсәнгә көн саен Лилуның фото һәм видеоларын җибәреп тора. Юлбарыс баласы ай үсәсен көн үсә! Ә кыз яңа дустына үзенең хәлләре турында сөйли.
ДИМАШ БЕЛӘН ОЧРАШУ
– Бу җәйдә бер генә түгел, берничә хыялым чынга ашты. Башта мин искиткеч кешеләр, юлбарыс баласы белән таныштым, ә аннары кумирым – Димаш белән очрашу насыйп булды.
Танылган казах җырчысы Димаш Кудайбергенов Ләйсән турында Малаховның «Күз яшьләре белән хыяллар» дигән тапшыруын төшергәндә белеп ала. Шулвакыт ул кыз өчен видеосәламләү яздыра, аны Ләйсән үзенә бүләк ителгән телефон аша карый. Ә бераз соңрак, WordSkills Kazan 2019 чемпионаты ярдәмендә, башкаручының тыгыз графигында Татарстан башкаласы барлыкка килә.
– Ул хосписка ябылу тантанасы башланырга сәгать ярым вакыт калганда килеп керде. Кунак турында мин алдагы көнне белдем, кызыма әйтмәдем, сюрприз ясыйсым килде, – дип сөйли Ләйсәннең әнисе.
Кыз да сүзгә кушыла:
– Ниндидер гадәти булмаган вакыйга булыр, дип сизенгән идем. Очрашу көненә каршы төндә төшемә Димаш керде, ул минем өчен иртәнге сәгать 4кә кадәр җырлады. Шуңа күрә йокым да туймады, ләкин ниндидер могҗиза көтү халәтендә идем. Әнинең дә палатаны башка төрле итеп җыештыруына, бизәнүенә игътибар иттем... Мин аннан сорадым да әле: «Әни, син бүген нишләп шундый матур соң?», – дип. Әни: «Кәефем яхшы, шуңа гына», – диде, һәм башыма Димашның фанатлар төркеме бүләк иткән казах яулыгын бәйләргә кушты.
Очрашу вакытында кыз да, җырчы да югалып кала. Ләкин беренче дулкынлану хисләре тынгач, алар ихлас күңелдән утырып сөйләшәләр.
– Ул килеп кергәч, югалып калдым, җанымны кая куярга белмәдем. Үземә-үзем: «Ләйсән, тынычлан, барысы да яхшы, кычкырма, тирән сула», – дип пышылдадым. Минем аңа бармак очлары белән генә кагылып карап: «Ул тере, ул монда!» – диясем килде. Сәер булып күренмәс өчен, үземне тыйдым инде, – дип көлә Ләйсән. Мин аннан ничек шундый гаҗәеп башкару осталыгына ирешүе турында сорадым. Ул миңа 5 яшьтән җырлый башлавы, ата-анасының һәм дусларының иҗади кешеләр булулары һәм һәрвакыт аңа ярдәм итүләре турында сөйләде.
Кызның караваты янында хәзер автографлы Димаш портреты эленеп тора. Казах теленнән тәрҗемәсе дә эчкерсез гади: «Ләйсәнгә, сеңлемә, хөрмәт белән Димаштан».
– Аның тавышын мин беренче тапкыр 2017 елда ишеттем, Кытайда чыгыш ясавы иде. Бу тавыш һәм башкару рәвеше мине таң калдырды, ләкин мин аның исемен истә калдырмадым һәм аннары таба да алмадым. Ә быел мин аны тагын күрдем һәм тыңлый башладым. Аның җырлавы, хисләрен белдерү үзенчәлеге, тавышының мөмкинлекләре – барысы да минем күңелемә тынычлык бирә.
СӘЛАМӘТЛӘНЕРГӘ!
– Ләйсән икенче класста укыганда чирли башлады, шуннан соң без вакытыбызның күп өлешен хастаханәләрдә үткәрәбез, – дип сөйли Әлфия. – Безнең өчен кызыбызның исән булуы һәм тормыш өчен көрәшүе – үзе зур бүләк һәм уртак хыялыбызның чынга ашуы.
– Иң зур хыялым – терелү, бу катлаулы һәм озын юл, – ди хыяллары чынга аша башлаган кыз. – Ләкин мин сәламәтләнүемә ышанам. Хыял чынга ашканда, үзеңне бәхет канатларында очкан кебек хис итәсең. Хәзерге вакытта минем кебек үк хыялланучыларга теләгем шул: хыялланыгыз, бөтенләй чынга ашарлык булмаса да, хыялга омтылыгыз, башкаларга да үз теләкләрегез турында сөйләгез, чөнки ярдәм итә алырлык кешеләр гел очрап тора.
ҮЗ ФАНАТЛАРЫНЫҢ ФАНАТЫ
Димаш белән элемтәгә керергә аның Самарадагы фанатлары ярдәм итте. Алар кумирларының чыгышын карарга дип, WorldSkills Kazan 2019 чемпионатының ябылу тантанасына башкалабызга килгәннәр иде. Чыгышы алдыннан Димашның Казан хосписына барып, анда яткан Ләйсән исемле кызның күптәнге хыялын тормышка ашырачагын да алар беренчеләрдән булып белделәр. Һәм аны борчымаска тырыштылар. Шуңа күрә «Татарстан»ның сорауларын үзләренең «ВКонтакте»дагы төркемнәре аша юлладылар. Җавапларны концерт тәмамлануга ук алдылар. Димаш – үз фанатларының фанаты – озак көттермәде.
– Димаш, сез ни өчен Казан хосписындагы кыз янына барырга булдыгыз?
– Мин башкача булдыра алмыйм. Минем иҗатымны үз иткәннәргә бик зур хөрмәт белән карыйм. Мин бит үз фанатларымның фанаты.
– Үзеңне кемнеңдер тормышка ашырылган хыялы итеп сизү ничегрәк?
– Үземне кемнеңдер тормышка ашырылган хыялы яисә йолдыз итеп сизмим. Йолдызлар – күктә, ә мин – гади кеше, тик бераз җырлый белүче. Без барыбыз да бу дөньяга, иң беренче чиратта, кеше булыр өчен, зур хәрефтән язылырлык Кеше булыр өчен килгәнбез, бары тик аннан соң гына җырчы, укытучы, табиб һәм башкалар булабыз.
Югарыда аталганнарга өстәп, фанатлары үзләренең кумирын бик тыйнак егет диләр, беркайчан да үзе эшләгән игелекле эшләр турында сөйләмәс. Ул уңайсызланып җилкәләрен генә җыерачак. Ә күркәм эшләрне ул күп эшли. Үз туган көнендә, тамагы авырткан килеш, шау-шуларсыз гына картлар йортына барып, өлкәннәр каршында акапелла җырлаган җырчыларны күп беләсезме?
Добавить комментарий