Олы Елга авылы халкы: “Бу мәчет безне күп бәлалардан саклап калды”

Мәчет үзенең тарихында ниләр генә күрмәгән. Дистә еллар халыкка гыйбадәтханә буларак хезмәт иткәннән соң, аның язмышы фаҗигале төгәлләнергә тиеш була. 1930 нчы елларда, мәчетнең манарасын кисәргә дип, читтән кешеләр килә. Шулвакыт давыл чыга, күктә кара болытлар куера. Килгән кешеләр, бу хәлне күреп, кире китәләр. Шулай итеп авылда мәчет торып кала. Дөрес, ул барыбер гыйбадәтханә буларак кулланылмый. Колхоз амбары ясыйлар аннан: ашлама, иген саклыйлар. Ләкин иртәме-соңмы мәчет яңадан иман нуры чәчә башлый.





- 1990 нчы елда мәчеттә намаз укый башладылар, - диде Олы Елга авылы музее җитәкчесе Хәтимә апа Солтанова. – Аны яңарттылар, матурладылар. 2016 нчы елда яңадан ремонт ясап чыктылар. Тик манарасы бер якка авышкан иде. Ничек кенә карап тотсаң да, 140 еллык бина бит! Без мәчетне яңадан торгузуга шат кына. Тик менә бер генә теләгебез – элеккеге рәвешен югалтмасын иде. Аның ае нәкъ кыйблага карап торды. Олы Елгада беркайчан гарасатлар булганы юк. Без моны мәчетнең саклау көче белән бәйлибез...
Олы Елга авылы мәчетенә республика әһәмиятендәге архитектура һәйкәле статусы бирелгән. Татарстанда тарихи әһәмияткә ия булган 121 агачтан төзелгән архитектура объектының берсе ул. Проектның җитәкчесе – танылган архитектор, РСФСР дәүләт премиясе лауреаты Александр Попов.