Җаваплылык!

Башта алар Казан шәһәре Мэриясендә булып, кайнар котлаулар кабул иттеләр. Аннан соң башкаланың 161 нче сайлау участогына барып тавыш бирделәр. Инде көннең икенче яртысында ресторанга – Коръән ашына юнәлделәр.

-Без гомергә сайлауга җәмәгатем белән бергә йөрдек,- ди Вәзилә Әскәрова. – Гадәттә, иртән беренчеләрдән булып килә идек. Бездә җаваплылык көчле – үзем бик күп еллар санитар табиб булып эшләдем. Иптәшем Вакыйф гади машина йөртүчедән башлап баш инженер, техник директор вазыйфаларына кадәр күтәрелде. Җаваплылык, эшне җиренә җиткереп үтәү – безнең гаиләнең девизы.

Гаилә башлыгы Вакыйф абый җәмәгатенең сүзен хуплап: “Бүген шундый сөенечле көн. Ике улыбыз, алты оныгыбыз янәшәбездә. Үзебез исән-сау, моннан да олы бәхет бармы?! Дөньяларыбыз тыныч булсын, илебез алга барсын. Оныкларыбызны бәхетле киләчәк көтсен”,- диде.
Әскәровлар 161 нче сайлау участогында янә бер кат котлаулар кабул итте. Әлеге сөйкемле парга килгән халык та сокланып карады һәм тигезлек, саулык теләде.