Илһам Шакиров нәселен дәвам итүчеләр...

Күптән түгел легендар җырчыбыз Илһам Шакировның туган ягы – Тукай районы Яңа Бүләк авылында булдык. Биредә атаклы нәселнең дәвамчылары белән таныштык.

- Мин Илһам абыйның бертуганы Кыяметдинның олы улы булам, - диде Флүр абый Шакиров. – Гаиләдә өч ир, бер кыз бала үстек. Күп еллар колхозда баш агроном булып эшләдем. Казан авыл хуҗалыгы институтын тәмамладым. Илһам абый: “Иң тыныч, иң кирәкле һөнәр – ипи үстерүче. Дөрес юлны сайладың, молодец. Артист булмагыз, кирәк түгел”, - дип әйтә торган иде. Илһам абый безгә еш кайтып йөрде, үзебез дә аның янына Казанга бара идек.

– Сезнең гаиләдә күбесе җырлый, диделәр безгә...

– Әйе, Аллаһы Тәгалә барыбызга да андый сәләтне биргән. Энекәш, сеңелкәшләр кайда гына эшләсәләр дә җырлап яшиләр...