“Марттан бирле кыяр ашыйбыз!”

–Бүген өч кыяр өздек, аны әбәд ашаганда балаларга турап бирәбез, көтеп торалар бит,- диде “Күбәләк” төркеменең кече тәрбиячесе Ләйсән Бәдретдинова. – Безнең төркемдә мәктәпкәчә яшьтәге балалар тәрбияләнә. Кыярга суны үзләре сибәләр. Карап торып үстерәләр.
Кыярларны 2 февральдә утыртканнар: “Апрельский” һәм “Кураж” сортлары. Беренче кыярлар мартның 18 дә өлгергән. Шуннан бирле көн саен бер, ике кыяр өзәләр.

-Аннан бигрәк балалар өчен тәҗрибә бу,- диде Ләйсән. – Кыяр үскәнен дүрт күз белән көтәләр. Чын хезмәт тәрбиясе бу. Тиздән бу кыяр үсентеләрен чиләге белән бакчаның ишегалдына чыгарачакбыз. Ни өчен дигәндә, тәрәзә төбендә кояшта аларның яфраклары саргая, ә ачык һавада ул әле җәйгә кадәр кыяр бирәчәк.