Күбрәк тормышларны яши алыр өчен...
Ания Фәйзрахманова белән музыка турында түгел, ә китаплар турында сөйләшергә булдык.
28 октября 2016
Альтернатив татар музыкасын үз итүчеләр соңгы ел эчендә үзләре өчен яңа бер төркемне ачтылар. Juna төркемен. Тиз арада Juna төрле кичәләрнең, фестивальләрнең, флэшмобларның катнашучысына һәм тыңлаучыларның фаворитына әверелде. Әл яңа гына Мәскәүне яулап кайттылар. Шул уңайдан да, түгел дә... без төркемнең солисты, музыкант, автор-башкаручы Ания Фәйзрахманова белән музыка турында түгел, ә китаплар турында сөйләшергә булдык.
- Балачак, үсмер чорыңда иң көчле тәэсир иткән китап?
- Балачакта иң тәэсир иткән китаплар – маҗаралар һәм хайваннар турындагы әсәрләр булгандыр. Жюль Верн, Жак-Ив Кусто, Джеральд Даррелл, пиратлар турындагы китаплар, Көнчыгыш әкиятләре. Бу китапларда дөньяда ниләр барлыгы турында да бик күп мәгълүмат тупланган иде: физикадан башлап, җәмгыятьнең ни белән яшәвенә кадәр. Мин аларны нигездә җәйләрен дачада укый идем, авантюр холкымны дөрләтеп җибәрергә җитә кала иде ул китаплар! Соңрак миндә дә, бик күпләрдәге кебек үк, «Поттер чире» булып алды. Поттердан соң, аның Россия базарында таралган аналоглары – Таня Гроттер, Мефодий Буслаевлар чоры. Ара-тирә болар арасына Лев Толстойның «Война и мир» исемле «кирпече» дә кереп чыккалады. Ул мине мавыктырса да, бар тирәнлегенә төшеп җитә алмавымны тоемлый идемме шунда – жанры тарта үзенә, ә асылы... кала.
- Иң яраткан китапларың?
- Рэй Брэдбери. «Октябрьская страна» җыентыгы. Аның дөньялары стандарт кагыйдәләрне җимерә алуы белән җәлеп итә. Аларга «керәсең» дә, үзеңне ниндидер кызыклы вакыйгаларның, маҗараларның бер өлеше итеп хис итә башлыйсың, чынбарлыкта да шуларның параллельләрен эзлисең. Иван Гончаровның «Обломов» әсәре. Мин аны көч-хәл белән укып чыктым, шундый эчпошыргыч булып тоелган иде беренче укыганда. Ә аннары, кайта-кайта укый башлагач, гаҗәеп кызыклы була башлады – нәкъ үзең турында язылганны укыйсың бит! Ул китаптан соң, яшәү гадирәк һәм җиңелрәк булып тоела башлый, җиңел сулап куясың. Адәм затының камил түгеллеген аңлыйсың да, бу тойгы белән дә яшәргә мөмкин булуына төшенәсең. Үзеңне аклап, кулыңны төшерәсең дигән сүз түгел бу, ә шул камиллеккә ирешү юнәлешендә һәр көн эшләргә дә, эшләргә кирәк икәнлегенә инанасың. Шул ук тема Кафкада һәм Достоевскийда да дәвам итә – «Процесс»та, «Преступление и наказание»да.
- Күңелеңне кайтарган китаплар?
- Күңел кайткан китабым юк әлегә. Мин бит күңелем кайтыр дәрәҗәдә күп укымыйм! Китапны, гадәттә, беренче битләреннән үк ошамаса, укымыйм, һәм аңа кире кайтмыйм гына.
- Хәзер нәрсә укыйсың?
- Тревор Бейкерның «Том Йорк в Radiohead и соло» китабын тагын бер кат укып чыгарга булдым.
- Кәгазь китапмы, электрон версияме?
- Ничек тә ярый, әллә ни зур әһәмият бирмим.
- Безгә укырга тәкъдим итәр идең...
- Балалар өчен – Жюль Вернны һәм Джеральд Дарреллны. Иҗатында авыр чор кичергән, үз-үзенә ышанмаганрак талантларга Леонид Тишковны укырга киңәш итәм. Бер тамчы сәләтең дә булмаган килеш, ничек итеп даһи рәссамга әверелергә мөмкин соравына җавап табар өчен генә булса да.
- Китап синең тормышыңда нинди урын алып тора?
- Билгеләнгән тормыш кысаларыннан чыгып, күбрәк тормышларны яшәп карый алу мөмкинлеге бирә.
Добавить комментарий