Айнур Тимерханов Болгар ислам академиясе җитәкчесе итеп билгеләнде

Болгар ислам академиясе ректоры вазифаларын башкаручы итеп моңа кадәр фән буенча проректор булган Айнур Тимерханов билгеләнде. Бу турыда Академиянең матбугат хезмәте хәбәр итте.
«Бүген Болгар ислам академиясе учредительләре советы утырышында каралган мәсьәләләрнең берсе — ректор вазифаларын башкаручыны билгеләү иде. Учредительләр советы әгъзалары академиянең фән буенча проректоры Айнур Тимерханов кандидатурасын тәкъдим итте. Аның кандидатурасы бертавыштан расланды», — диелә хәбәрдә.
«Ислам фәннәре буенча югары уку йортын җитәкләү минем өчен зур дәрәҗә һәм җаваплылык. Билгеле булганча, Болгар ислам академиясе Россиядә Ислам фәннәрен укыту системасының иң югары баскычында. Шуңа күрә академия алдында бөтен ил масштабындагы зур бурычлар тора», — дип үз чиратында рәхмәтен белдерде Айнур Тимерханов.
Болгар ислам академиясен 2019 елның мартыннан Данияр Абдрахманов җитәкләде. Күптән түгел аның үз вазифасыннан китүе билгеле булды.
"Татар-информ"