Быел балаларны беренче сыйныфка кабул итү кампаниясе 1 апрельдән старт алачак

Быел балаларны беренче сыйныфка кабул итү кампаниясе 1-нче апрельдән старт алачак. Бу РФ Мәгариф министрлыгының яңа боерыгы үз көченә керүгә бәйле, анда шул исәптән гаризалар бирү сроклары да үзгәртелгән. Бу хакта бүген Казанның Башкарма комитетында эшлекле дүшәмбе киңәшмәсендә Мәгариф идарәсе башлыгы Ирек Ризванов хәбәр итте.
Элегрәк кабул итү кампаниясе 1-нче февральдән үк эшли башлаган. Үз көченә кергән документ нигезендә, мәктәпкә беркетелгән территориядә яшәүче, шулай ук беренче сыйныфка керү хокукы булган балаларны кабул итү өчен гаризаларны 2021 елның 1-нче апреленнән 30-нчы июненә кадәр тапшырырга мөмкин. Мәктәпкә беркетелгән территориядә яшәмәүче һәм буш урыннарга алынучы балаларны кабул итү өчен гаризалар 2021 елның 6-нчы июленнән 5-нче сентябренә кадәр тапшырылачак.
«Бүгенге көндә барлык кирәкле документлар да яңа боерык белән туры китерелә. 2021 елның мартында, ата-аналардан гаризалар кабул ителә башлаганчы, Мәгариф идарәсе киң мәгълүмати кампания уздырачак һәм мәктәпләргә кабул итүнең яңа кагыйдәләрен аңлатачак», – дип хәбәр итте И.Ризванов. Казан Мэры Илсур Метшин булачак беренче сыйныф укучыларының әти-әниләренә үзгәрешләр турындагы бөтен мәгълүматларны максималь рәвештә җиткерүне йөкләде.
Исегезгә төшерәбез, 1-нче сентябрьдә парта артына тәүге тапкыр 18 мең 976 укучы утырды. Ел саен шәһәрдә беренче сыйныф укучыларының саны якынча 1,5-2 меңгә арта, һәм яңа уку елына 20 меңнән артык укучы көтелә.
Бүгенгә Татарстан башкаласында 166 муниципаль мәктәп эшли.
KZN.RU