Илсур Метшин Казан муниципаль берәмлеге башлыгы итеп сайланды

Бүген дүртенче чакырылыш Казан шәһәр Думасының беренче сессиясендә Илсур Метшин Казан муниципаль берәмлеге башлыгы, Татарстан башкаласы Мэры итеп сайланды. Ул үзенә карата күрсәткән ышанычлары өчен депутатларга рәхмәт белдерде. «Сезнең белән бергә Казан һәм аның халкы хакына эшләргә сүз бирәм», - диде ул.
Илсур Метшин кандидатурасын Казан муниципаль берәмлеге башлыгы, шәһәр Мэры вазифасына тәкъдим итү турындагы карар «Бердәм Россия» бөтенроссия партиясе фракциясеннән килде. Әлеге карар элегрәк партия генераль советы Президиумы утырышында хупланды. Башка партияләрдән Казан муниципаль берәмлеге башлыгы вазифасына кандидатуралар тәкъдим ителү турында хәбәрләр килмәде. Шулай итеп, бюллетеньгә бер кандидатура кертелде.
Утырыш вакытында тәнәфес игълан ителде, аның вакытында Казан шәһәре депутатлары яшерен тавыш бирүдә катнашты. Аның өчен 50 бюллетень әзерләнгән иде, 48-е таратылды, дип хәбәр итте хисап комиссиясе рәисе Лилия Бакулина. Тәкъдим ителгән кандидатураны 44 депутат хуплады, 4 депутат каршы чыкты.
«Шулай итеп, Казан муниципаль берәмлеге башлыгы, Казан шәһәре Мэры итеп Метшин Илсур Рәис улы сайланды», - дип игълан итте Л.Бакулина.
Депутатлар Казан муниципаль берәмлеге башлыгын сайлау турындагы карар проектын хуплады. Шуннан соң яңа сайланган шәһәр Мэры вазифасына керешү тантанасы булды. Сайлау комиссиясе рәисе Фәрит Гәрәев И.Метшинны вазифага сайлануы белән котлады. «Сезгә шәһәр язмышы өчен зур җаваплылык йөкләнгән, һәм без сезнең җитәкчелектә республика башкаласының яңа үрләргә ирешәчәгенә ышанабыз», - диде ул.
Илсур Метшин Казан Мэры антын кабул итте, шуннан соң аңа Татарстан башкаласы башлыгы вазифаи билгесен тапшырдылар.
Шәһәр башлыгын вазифага сайлануы белән ТР Президенты Рөстәм Миңнеханов котлады. «Шәһәрдә соңгы 15 елда эшләнгән бөтен үзгәрешләр Илсур Метшин җитәкчелегендәге зур команданың хезмәте турында сөйли, - диде Р.Миңнеханов. - Шәһәр башлыгына ярдәм итүегезне сорыйм, хөрмәтле депутатлар. Республика башкаласы Мэры сезнең бердәм команда булуыгызны һәм алга таба бөтен шәһәр, бөтен республика файдасына бергә эшләячәгегезне аңларга тиеш».
 
KZN.RU