Иннополис мәктәбендә икенче смена барлыкка килергә мөмкин

Иннополис мәктәбендә икенче смена барлыкка килергә мөмкин. Хәзерге вакытта биредә булган сыйныфларны киңәйтәләр һәм яңа педагоглар туплыйлар, дип хәбәр итте «Татар-информ» агентлыгына биргән интервьюсында  Иннополис мэры Руслан Шагалиев.

Ул билгеләп үткәнчә, бүген Иннополиста уку-укыту процессы тулысынча бер бинада башкарыла. Бу исә балалар бакчасы өчен өстәмә урыннар булдырырга мөмкинлек биргән.

«Без Иннополиска эшкә килгән резидент-компания хезмәткәрләренең берсен дә кире бормыйбыз. Хәзерге вакытта өстәмә сыйныфлар, төркемнәр җыябыз, мәктәпкә өстәмә персонал туплана. Быел икенче сменага да күчәрбез, мөгаен. Безнең ике бинабыз бар, моңарчы аларның берсендә – балалар бакчасы һәм башлангыч мәктәп урнашкан, ә икенчесендә урта һәм өлкән сыйныфлар укый иде. Хәзер уку-укыту процессы тулысынча бер бинада башкарыла. Быел бездә ясле төркеме дә ачылды», – дип белдерде Руслан Шагалиев.

«Татар-информ»