Казанда мотосерфинг буенча Дөнья кубогы этабы узачак

27-нче августтан 30-нчы августка кадәр Казансу елгасы акваториясендә мотосерфинг буенча Дөнья кубогы этабы узачак. Ярышларда дөньяның җиде иленнән 50-гә якын спортчы катнашачак.
Мотосерфинг мотоспорт һәм серфинг миксы булып тора – катнашучылар дистанцияне махсус мотосерфта узуда ярыша.
Казанда ярышлар өч көн дәвамында узачак: беренче ике көндә спортчылар трассаны сынаячак һәм күнегүләр үткәрәчәк. Шулай итеп, 27-нче августта күнегүләр 17:00 сәгатьтә, 28-нче август көнне 8:30 сәгатьтә башлана. Ә 29-нчы август көнне 9:00 сәгатьтә беренче квалификация ярышлары башлана.
Финал ярышларын шәһәр халкы 30-нчы августта күрә алачак, башлана – 17:00 сәгатьтә. Тамашачылар өчен керү ирекле. Ярышны «Казан» гаилә үзәге янындагы ачык мәйданчыклардан күзәтергә мөмкин булачак.
Элегрәк дөнья беренчелеге этаплары Монако, Бөекбритания, Чехия, АКШ, Мексика, Кытай һәм Кореяда узды. Россиядә моңа кадәр Motosurf WorldCup этабы 2017 елның июнендә Санкт-Петербургта гына узды, дип хәбәр итә ТР Спорт министрлыгы матбугат хезмәте.
KZN.RU