Казанда пенопласт җитештерү цехында зур янгын чыккан

11 ноябрь, иртә белән Казанда, Тэцевская, 295 адресы буенча, пенопласт җитештерү цехы янды. Моның турыда Татарстан Республикасы буенча Русия ГТХМ Баш идарәсенең матбугат хезмәте хәбәр итә.
Оператив хезмәтләргә хәвефле сигнал 8:21 сәгатьтә килде. Янгын сүндерергә Казан янгын сүндерү һәм коткару гарнизоны көчләрен куйдылар. Урынга килеп җитүгә янгын сүндерүчеләр 80 квадрат метр чамасы җитештерү цехы янганын ачыкладылар.
8: 53тә янгын сүндерүчеләр ачык утны сүндерделәр. Янгынның сәбәбен дәүләт янгын күзәтчелеге хезмәткәрләре билгеләячәк.