Рөстәм Миңнеханов: «Безгә санкцияләр комачауламый!»

Инде хәбәр иткәнебезчә, бу минутларда башкалада зур чара – «Россия — Ислам дөньясы» Xалыкара икътисадый хезмәттәшлек саммиты бара. Ул 12 майга кадәр дәвам итәчәк. Россия һәм Ислам хезмәттәшлеге оешмасына керүче илләр катнашында үтә торган әлеге чара Татарстанда 2009 елдан башлап унынчы тапкыр оештырыла. Аның эшендә 23 дәүләт илчелекләренең дипломатлары, 50 ислам дәүләтеннән һәм Россия төбәкләреннән килгән 3000гә якын икътисад белгече катнаша.
Саммитта Татарстан Президенты Рөстәм Миңнеханов та чыгыш ясады:
– Санкцияләр беркемгә дә файдалы түгел, – диде ул. – Тик әлегә Татарстан компанияләренең төбәк дәрәҗәсендә Европа Берлеге һәм АКШтагы партнерлары белән бернинди проблемалары тумый. Без Америкадагы, Европадагы партнерларыбыз белән элемтәләрне сакларга тырышабыз. Безгә Европада ихтыяҗ булачак. Бүген анда мөселманнар саны арта, аларга хәләл продукт кирәк.
 
Руфия Фазылова