Сентябрь аенда Казанда халыкара спорт форумы узачак

Ил президенты Владимир Путин Казанда «Россия – спорт державасы» халыкара спорт форумын уздыру турында боерыкка кул куйды. Чара Татарстан башкаласында 8-нче сентябрьдән 10-нчы сентябрьгә кадәр узачак.
Форум узган елның октябрендә Екатеринбургта узарга тиеш иде, ләкин коронавирус пандемиясе аркасында аны күчерделәр.
«Россия – спорт державасы» форумы 2009 елда физик культураны һәм спортны, халыкара спорт хезмәттәшлеген үстерү, шулай ук сәламәт яшәү рәвешен пропагандалау максатында оештырылды. Форум беренче тапкыр 2009 елның 22-нче октябреннән 25-нче октябренә кадәр Казанда узды. Татарстан башкаласы 2013 елгы XXVII Бөтендөнья җәйге Универсиадасын үткәрү алдыннан сайланган иде.
Гадәттәгечә чара 3 меңнән артык катнашучыны – Олимпия чемпионнарын, ил субъектлары башкарма хакимиятенең тармак органнары җитәкчеләрен, спорт федерацияләре һәм спорт объектларын, шәхси эшмәкәрлек вәкилләрен, журналистларны, спорт индустриясе экспертларын берләштерә, дип хәбәр ителә форум сайтында.
 
KZN.RU