Канатлы барс ни сөйли

Күргәзмәдә Казанның оста каллиграфы, Россия ислам институты каршында Гарәп каллиграфиясе үзәгенә нигез салган Рамил Насыйбулловның сигез хезмәте урын алган.

Рамил Насыйбуллов – күренекле кешеләрнең, шул исәптән Россия Президенты Владимир Путинның, Татарстан Рәисе Рөстәм Миңнехановның һәм башка бик күпләрнең шәхси туграларын ясаган кеше.

Күзгәзмәнең үзенчәлеге – «Безнең барс» – Татарстан символы. Бирегә килгән кунакларга республиканың канатлы символы төшерелгән туграсы турында тулырак итеп тарих фәннәре докторы Искәндәр Измайлов сөйләде:

– Бабаларыбызның беренче символлары сыйфатында төрле тамгалар йөргән, тора‑бара алар төрле сурәтләр белән алыштырыла башлый. XVI–XVII гасырларда, инде Рус дәүләте составында, Казан патшалыгында (воеводасында, соңрак – губернасында) җирле традицияләргә һәм риваятьләргә нигезләнгән үз символлары пәйда була. Зилант белән Барс шундый символлардан санала, – дип аңлатты ул.

Чара ахырында Рамил Насыйбуллов мастер-класс оештырды. Анда һәркем татар каллиграфиясе традицияләрендә ясалган үз исеме үрнәген алды.