Яңа ел табынына – «Без» салаты

Яңа ел җитәргә санаулы сәгатьләр генә калып бара. Инде бүләкләр хәстәрләп өлгергәнсездер, шәт. Хәзер иң мөһиме – Яңа ел табынын әзерләү. Без, хатын-кызлар, моңа аеруча җитди якын киләбез: ризыкны үзенчәлекле дә, җиңел дә итәсебез килә. Яңа ел алдыннан «Татарстан» редакциясе телевидениесе алып баручысы, мөхәррир Айгөл Нәбиуллинада кунакта булдык. Шигъри җанлы ханым белән «Без» салаты ясадык.

26 декабря 2019

«ҮЗГӘРТЕРГӘ КИРӘК...»
Айгөл тормыш иптәше Илдар, улы Альфред, кызы Әминә белән Казанның Самосырово бистәсендә үз йортлары белән яши. Ә, тагын бер гаилә әгъзасын онытып торам икән – «Шустрик» кушаматлы песи. Ризык әзерләгәндә ул безне шулкадәр игътибар белән күзәтте ки, әйтресең, сөйләшкәннәрнең барысын да ишетеп кенә түгел, ә аңлап та торды.
Хуҗабикә белән сүзне балачак турында сөйләшүдән башладык. Ни өчен дигәндә, Яңа ел диюгә, иң беренче балачак белән бәйле хатирәләр күз алдына килеп баса.
– Без гаиләдә дүрт бала үстек, – диде Айгөл. – Апам, игезәк энеләрем бар. Балачакта Яңа ел иң матур, иң әкияти бәйрәм бит ул. Башта чыршы бизәүне көтә башлыйсың, аннан – бүләкләр... Бүләк дигәч тә, ул әллә нинди затлы уенчыклар да түгел инде. Безнең заманның Яңа ел бүләге тәм-томнар иде. Конфет, пакетка бер‑ике мандарин салынган булыр. Ул заманда алар көн дә ашала торган ризык түгел бит. Һәм берничә көнгә сузылган чыршы бәйрәмнәре... Эй, ничек күңелле була торган иде! Башта аны мәктәптә, укучылар өчен спортзалда оештыралар. 31 декабрь көнне авыл клубында бал-маскарад була. Әле концерттан соң лотерея уйнала. Клуб тулы кеше! Шуннан өйгә төшеп тәмле әйберләр ашыйбыз да йокларга ятабыз. Тик нишләптер уникегә кадәр калганны бик хәтерләмим.
Ул арада хуҗабикә салатка кирәк булган әйберләрне юып, корытты. Аннан яшел яфракларны тәлинкәгә җәйде.
– Үзегезне уңган хуҗабикә дип саныйсызмы? – дип сорап куйдым.
– Уңган, дип. Чисталыкны яратам. Өемдә гел тәртип. Ә менә ризык пешерүгә килгәндә... Без бүген бик тиз режимда яшибез, һич кенә дә вакыт юк. Шуңа күрә тиз әзерләнә торган ризыкларга өстенлек бирәм. Сатып кына алган чаклар да була. Вакытка карап инде. Әлбәттә, хәзер гаиләбез зур, ризык әзерләми калып булмый.
Хуҗабикәнең «гаилә зур» диюе кайбер укучыларыбызга аңлашылып та бетмәскә мөмкин. Шуңа күрә Айгөл Нәбиуллинаның кайбер серләрен ачыйк.
– Кияүгә иртә чыктым мин, – дип сөйләп китте Айгөл. – Казан дәүләт мәдәният институтының театр факультеты, актерлык осталыгы бүлегендә ике ел укыгач, кияүгә чыктым. Әмма тормыш сынаулардан тора бит, ике ел да яшәмәдек, ирем гүр иясе булды. Кечкенә улым Альфред белән акчасыз, тораксыз, икәү генә торып калдык... Авылга кайтып, сыер да саудым. Тик тормышымда нәрсәнедер үзгәртергә кирәк дигән уй мине туган авылымнан янә читкә алып китте. Башта Арча мәдәният йортында эшләдем. Аннары «Казан» милли-мәдәният үзәгенә чакырдылар. Менә шулай итеп сәнгать, җырлар, җырчылар дөньясына кереп киттем. Соңгы елларда Казан шәһәр филармониясендә директор вазыйфасын башкардым.
«СӘЛАМӘТ ЯШӘҮ РЕЖИМЫН САКЛЫЙМ»
Сүздән аерылмый гына салат ясауны дәвам иттек. Хуҗабикә пешкән тавык итен салат яфраклары өстенә бүлгәләп салды. (Кисәсе түгел, нәкъ менә җепселләр буенча аерырга.) Аннан сыр уарга кереште.
– Тавык итенең ак өлеше кирәк, – диде Айгөл. – Мин аны тозлы шулпада пешереп алдым. Бу салат җиңел була, шуңа күрә тавыкны кыздырырга яки ысланганын алырга киңәш итмим.
Шуннан хуҗабикә тавык ите өстенә уылган сыр җәйде.
– Арасына майонез салып тормыйм, алай итсәң, майлы була, – диде. – Ә менә сырдан соң аз гына майонез сылана. Катлы салат ясаганда белеп эшләргә кирәк: ризыкларны, берсе өстенә берсен салганда, кашык белән тигезлисе түгел. Кул белән таратып чыгу да җитә.
Айгөл сәламәт яшәү рәвеше яклы, үзе дә бу кагыйдәләрне сакларга тырыша. Даими рәвештә спортзалга йөри, бассейнда йөзә. Ашауны да контрольдә тота – майлы, камыр ризыклары ашамый. Шул исәптән – майонезны да.
– Авырлыгымны гел контрольдә тотам, – диде ул. – Элек үземне алай карамый идем, берничә ел инде шулай яшим. Организмда бер җиңеллек, рәхәтлек тоям.
Айгөл сыр өстенә уылган йомыркаларны таратты. Аннан соң әстерхан чикләвеген ваклап сипте. Шуннан ике‑өч кашык майонез салып, салатның өстен тигезләде.
– Төп эш бетте дә, – диде ул. – Хәзер виноградларны урталайга кисеп, салат өстенә куеп чыгабыз да, салатыбыз әзер була. Менә монысы иң озак вакытны алачак.
«Бу салатны балалар белән бергә әзерләү күңелле икән. Виноградны рәхәтләнеп тезсеннәр», – диештек үзара.
Хуҗабикә виноградларны кисә торган арада, әңгәмәбезне дәвам иттек.
– Яңа ел бәйрәме сезнең гаиләдә ничек уза? – дип сорыймАйгөлдән.
– Күбрәк өйдә, йә булмаса дусларга барабыз. Яңа ел каршыларга башка шәһәрләргә, чит илләргә чыгып киткәнебез юк. Һәм кирәк дип тә санамыйм. Өйдә, чыршы янында, иң якыннарың белән бергә, менә шулай үзең әзерләгән ризыклар белән сыйланудан да рәхәте юк, минемчә.
Хуҗабикәнең «озак» дигәне әллә ни күп булмады. Биш минут дигәндә, виноградларны яртыга бүлеп, тезеп тә чыкты. Ризык әзерләргә барлыгы егерме минут тирәсе вакыт киткәндер.
– Хәзер тәмле чәй эчәрбез. Ирем Илдар командировкадан төрле‑төрле чәйләр җыеп кайткан иде. Ә салатыбыз азрак суыткычта торып торсын, алай тәмлерәк була, – диде хуҗабикә.
«МӘЙДАН»НАН КИТҮ...
Айгөл Нәбиуллина исеме җырчылар даирәсенә яхшы таныш. Үзе әйткәнчә, дистә елга якын Казан шәһәр филармониясе директоры вазыйфасын башкарды бит ул. Ә гади халыкка күбрәк «Мәйдан» каналы аша танылды. Алып баручы үзе бу турыда болай сөйләде:
– Филармониядә эшләп бик арыган идем. Ялсыз эшләгән чаклар да күп булды. Бүтән эш булса, ике дә уйламыйча, күчәр идем дип йөргән көннәрем... Шул чорда Казан дәүләт мәдәният институтында бергә укыган сабакташларым – Дамир Дәүләтшин белән Эдуард Үтәгәнов шалтыратты. «Татар музыкаль каналы ачарга ниятлибез. Безнең командага кушыласыңмы?» – диләр. Ике дә уйламыйча ризалаштым. Әле нәрсә булып бетәр, планнар чынга ашармы, белгән юк. Ә мин ризалаштым. Күрәсең, эчке бер тоемлау белән барысы да әйбәт буласын аңлаганмындыр. Беренче тапкыр 2011 елның 17 августында эфирга чыктык.

Башта без бары тик цифрлы каналда гына эшләдек. Берничә айдан ныгыдык һәм кабель челтәренә күчтек. Башлангыч чорда исемебез «ТМТ», ягъни Татар музыкаль телеканалы дип кенә йөртелде. Аннан соң утырып уйлаштык та, «Мәйдан» дигән исемгә тукталдык. Бөтен халыкларга да аңлаешлы бер генә тел бар, ул – музыка, сәнгать теле. Сәнгать яратучы, Сабан туйларында җыелып аралашучы, гөрләтеп бәйрәм итүче татарның үз мәйданы булырга тиеш, дип исәпләп, беренче татар музыкаль телеканалын «Мәйдан» дип атадык. Музыкаль канал дип аталса да, анда мультфильм, кинофильмнар да күрсәтелде, юмористик тапшырулар да барлыкка килде. Иң авыры‑архив туплау булды. Сез яңа канал дип, безгә берәү дә ярдәм кулы сузмады. Рәхмәт «Оскар-Рекордс» компаниясенә, үзләренең бөтен булган видеоязмаларын безгә бирделәр. Җыя торгач, барлыгы 500ләп видеоязмабыз тупланды.
– Ә ни өчен «Мәйдан» каналыннан киттегез?
– Хуҗалар алышынды, дөресрәге каналның акцияләрен икенче кешеләр сатып алды. «Мәйдан» каналы хәзер – «Татарстан – Яңа гасыр»ның бер тармагы.
– Яңа җитәкчелек сезгә башкача эшләргә куштымы?
– Кушарга өлгермәде, мин китеп өлгердем. «Мәйдан» каналының баш мөхәррире буларак, күп тапшыруларны үзем эшли идем. Башта бик борчылган идем. Хәзер исә тынычланып киләм, чөнки яңа «балабыз» – «Без» каналы туды. Тормышымның бер сәхифәсен ябып, икенчесен – яңасын ачтым.
«БУШКА ЭШЛИБЕЗ»
Бәлки әле күпләр белмидер дә, агымдагы елның ноябрь аеннан «Без» каналы эшли башлады. Нигездә ул музыкаль канал, «Мәйдан», «ТМТV» форматында. Ләкин яңа каналга үзенчәлекләр дә керткәннәр. Беренчедән, «Без» рус телендә дә сөйли торган канал булачак. Дөрес, күп түгел, әмма булачак.
– «Без» каналында җырлар, клиплардан тыш спортка, әдәбиятка зур урын биреләчәк, – диде Айгөл. – Белгәнебезчә, спорт матчлары рус телендә бара, аны тәрҗемә итеп күрсәтергә безнең мөмкинлекләр юк. Ничек бар, шулай бирәбез. Шулай ук безнең Татарстанда яшәп, рус телендә җырлаучы күпме матур җырчыларыбыз бар. Ара‑тирә аларның клипларын да кертәчәкбез. Рус кына түгел, төрки телләргә караган җырлар да булачак. Без бер-беребезне белергә, хөрмәт итәргә тиешбез.
– Әлбәттә, башта җиңел булмаячак, – диде Айгөл. – «Мәйдан»да да беренче ике елны җырчыларның җырларын бушка әйләндердек. Яшерен-батырын түгел, төп керем каналга шул җырлар аша килә. Реклама белән әллә ни акча эшләп булмый. Телеканал аякка бассын, халык арасында таралсын өчен, кимендә, биш ел таләп ителә. Ә без әле бушка эшлибез.
«Без» каналын бүген «Таттелеком» чыбыклы телевидениесе аша һәм интернет челтәреннән карап була.
– Дәүләт ярдәменнән башка телевизион канал ачуы авырмы? – дим Айгөлгә.
– Җиңел түгел. «Мәйдан» каналына лицензияне тиз алган идек, бу юлы бик озакка – берничә айга сузылды. Аяк чалучы юк болай үзе, шунысына рәхмәт. Хәер, республика җитәкчелеге яңа каналны хуплады. Бөтендөнья татар конгрессы белән дә элемтәдә торабыз. Без бит милләт өчен эшлибез. Әллә нинди зур акчаларга өметләнә дип уйлаучылар ялгышалар. Финанс ягыннан музыкаль телевидениене яшәтү бер дә җиңел түгел. Татар артистлары белән Россия шоу-бизнесы әһелләре арасындагы аерма җир белән күк арасы. Рус эстрадасы белән чагыштырганда, безнекеләрнең кереме йөзләрчә тапкыр кимрәк, шуңа күрә без алардан күп акчалар таләп итә алмыйбыз. Әнә, «МузТВ»да бер җырны әйләндерү дистәләрчә мең доллар белән исәпләнә. Татар шоу-бизнесында мондый акчалар юк, билгеле.
Иҗат турында сүз чыккач, Айгөл белән социаль челтәрләр турында да сөйләштек. Бүген бик күп эстрада вәкилләре блогерлык эше белән мавыга. Айгөл дә Инстаграм челтәрендә шактый актив эшли. Ундүрт меңнән артык язылучысы бар аның. Әлбәттә, блогерлар өчен бу әллә ни зур сан түгел, шулай да...
– Мин үземне чын блогер дип санамыйм, – диде Айгөл. – Инстаграм челтәрендә әле мин күптән түгел – бер еллап кына яшим. Күп итеп язылучыларым булсын дигән максатым бөтенләй булмады. «Мәйдан»нан киткәндә халык белән элемтәм югалмасын дип, социаль челтәрләрдә активлаштым. Хәзер үземә дә ошап китте. Тамашачы белән турыдан-туры элемтәдә тору өчен бу кирәк икән ул. Шундый нәтиҗәгә килдем әле.
...Айгөл чәй табыны әзерләде. Салатны матур итеп бүлеп алдыбызга куйды. Салат, чынлап та, туклыклы һәм җиңел. Миңа калса, Яңа ел табынына бер дигән булачак. Тагын бер серне чишим инде: салатка «Без» дигән исемне махсус уйлап таптык. Ни өчен дигәндә, беренчедән, аны бергә ясадык. Икенчедән, яңа каналның исеме дә шундый.
Саубуллашканда хуҗабикә журнал укучыларына Яңа ел теләкләрен җиткерде:
– Иң мөһиме – саулык. Алга максат куеп, бернигә дә карамыйча, шуңа барырга кирәк. Тормышта әллә нинди вакытлар була, уза ул. Үз мисалымнан чыгып әйтәм. Күгебез аяз, якыннарыбыз исән‑сау булсын. Калганы булыр!

АЙГӨЛ НӘБИУЛЛИНАДАН САЛАТ РЕЦЕПТЫ:
%d0%b1%d0%b5%d0%b7-%d0%b8%d0%bc%d0%b5%d0%bd%d0%b8-1070441